போகதான் போகிறோம் சங்கீதா-க்ருஷ் பிடிவாதம்

ஸ்விட்சர்லாந்தில் நடைபெறவிருக்கும் புத்தாண்டு கொண்டாட்டத்திற்கு செல்லக் கூடாது என்று தமிழ்நாட்டில் பிரச்சனை கிளம்பியதையும், இதையடுத்து அங்கு செல்வதாக இருந்த ஜீவா பின்வாங்கியதையும் பலரும் அறிவர். முதலில் இந்த நிகழ்ச்சிக்கு செல்வதாக முடிவெடுத்திருந்த சங்கீதாவும் அவரது கணவர் க்ருஷும் என்ன செய்யப் போகிறார்கள்? இந்த கேள்விக்கு பதில் சொல்லும் விதத்தில் நேற்றைய தினம் பத்திரிகையாளர்களை சந்தித்து நீண்ட விளக்கம் கொடுத்தார்கள் இருவரும்.

நாங்க கலைஞர்கள். உலகம் முழுவதும் சென்று நிகழ்ச்சி நடத்துவது எங்களுக்கு புதிதல்ல. இந்த நேரத்தில் சுவிஸ் தமிழ் அமைப்புகளுக்குள் நடக்கிற அரசியலில் எங்களை சிக்க வைப்பது கொஞ்சம் கூட நியாயம் இல்லை. தமிழ்நாட்டில் கூட புத்தாண்டு தினத்தன்று சுமார் ஆறு ஏழு குழுவினர் நடிகர் நடிகைகளை அழைத்து அவர்களுக்கு விருது தருகிற நிகழ்ச்சிகளை நடத்துகிறார்கள். அதுபோலதான் அங்கும் நடக்கிறது. அவர்களுக்குள் நடக்கிற போட்டியில் ஒரு குழுவினரை இலங்கை அரசுக்கு ஆதரவானவர்கள் என்று சித்தரிக்கும் வேலையை இன்னொரு குழு செய்கிறது.

சுவிஸ் நாட்டுக்கு செல்வது பற்றி நாங்கள் எங்கள் நடிகர் சங்க தலைவர் சரத்குமாரிடம் பேசினோம். அவர் இலங்கைக்கு செல்லவில்லையே, சுவிஸ்தானே போகிறீர்கள்? தாராளமாக போய் வாருங்கள் என்று கூறியிருக்கிறார். நாங்கள் இருவரும் கடந்த வருடம் கூட இதே குழுவினரின் அழைப்பின் பேரில் அங்கு சென்றிருந்தேன். அவர்கள் நல்லவர்கள் என்பதை கண்கூடாக பார்த்தவள் நான். எனவே இந்த நிகழ்ச்சிக்கு நான் மனப்பூர்வமாக செல்லதான் போகிறேன் என்றார் சங்கீதா.

மிரட்டலுக்கும் அவதுறுக்கும் பயந்து நாங்கள் போவதை நிறுத்தினால், அடுத்தடுத்த வருடங்களில் இதையே முன்னுதாரணமாக வைத்து இங்குள்ள நடிகர் நடிகைகளின் வருகையை தடுக்க நினைப்பார்கள். அதனால்தான் தைரியமாக இந்த பயணத்தை மேற்கொள்கிறோம் என்றார்கள் க்ருஷும் சங்கீதாவும்.

பார்வைக்கு தெரியுற நிலா பளபளன்னு இருந்தாலும் பக்கத்தில் போனால்தான் காடுமேடு தெரியும். நமக்கென்ன, இரு தரப்பு சொல்வதையும் கேட்டுக் கொள்வதை தவிர வேறு வழி?